CEBIER - 47

EDITO

COMISSIONS-CONSULTACIONS:
LO TEMPS DE LA RESPELIDA
Ò MAI D'UN AGANTA COLHONS?

A tornat lo temps dei comissions-consultacions. Mai de quaranta projèctes
de lei qu'an cabussat dins la prefondor dei banastas de l'indiferéncia "nacionala",
una situacion de l'ensenhament qu'es pas de dire, e l'anòncia facha a Nicòla (Péry)
per Jospin de recampar mai lo sentit deis interessats (?) dins nòstrei regions
reculadas d'Occitania, de Bretanha , de Còrsa, de Catalonha e d' autra part...
Quina originalitat! Pasmens,l'i fau respondre a aquesta ensacada nòva de la
question lingüistica! Felip Carbona,lo president de L'Institut d'Estudis Occitans
respondèt de òc a la demanda de se retrobar à Santa Gabèla per tornar dire lei
condicions d'una avançada : signatura de la Carta europenca, modificacion de
l'article 2 de la constitucion, mai tanben lo relectura -e mai!-d'unei projèctes de lei
jamai portats a la discutida de l'Assemblada nacionala.Subretot quitament aqueu
dau PS.Tanben de mesuras per l'ensenhament (calandretas, collègis e licèus), la
ràdiò, la television, la creacion artistica en occitan.
Dins aqueleis endevenenças seriá necite de prene d'iniciativas per far venir
la responsabla d'aquela comission dins cada region occitana-,que se mete en plaça
una demarcha de terren que fague lo bilanç dei besonhs e dei mancas (çò que
vòu dire tot!), demai lei revendicacions institucionalas. Dins lo meme temps, lo 14
de decembre se recamparàn a l'Assemblada nacionala de deputats coma Kofi
Yamgnane, Ivon Abiven, Noël Mamère amé Nicòla Péry. Es en seguida deis
engatjaments prés a Pradas, dins l'encastre de l'Universitat d'Estiu de Regions e
Pòbles Solidaris (R.P.S.), de far espelir un intergropa parlementari per tornar
pausar la question lingüistica e de la Carta europenca..
Veirem ben..., mai leis occitanistas son estats pron escaudats per creire que
sortirà un estatut juridic per la question lingüisticò-culturala.Sabon que l'article 2
de la constitucion pòt èstre modificat sens que la Republica n'agante la vairòla,
que la Carta europenca pòt èstre signada e ratificada sens que ren de significatiu
paregue dins la vida publica de cada jorn. Bòrd que se signa a la carta la Carta :
fau pas mai d'un tèrç deis articles per qu'un Estat siegue d'acòrdi...
Alora, comission-consultacion de per que faire? Per dire que lo rapòrt dei
fòrças es còntra nautrei un còp de mai? Qu'an besonh de nòstrei votz encara un
còp dins quatre mes? Per una pedagogia masochista sens endeman? Per donar
rason ai mèstres dau juòc politic que de Mitterrand a Chirac e Jospin encuèi
tenon la lenga de fusta sus aquelei questions? Sabi pas se darrier l'anòncia facha a
Nicòla nos direm cu serà lo Messias... Me pensi que, maugrat aqueleis arguments