ARMANAC DE MESCLUM PER L'ANNADA 1995 CALENDIER 1995 PORTISSON Se disiá autre temps : "Se fasèm vièlhs, fasèm un armanac". E cu a pas, ambé nostalgia fulhetat un d'aquesteis armanacs d'a passat temps... Mai "Mesclum", que pren de fòrças cada an se fa pas vièlh... e pasmens fa un armanac. Perqué ? Sabètz que cada setmana "Mesclum", la pagina occitana de "La Marseillaise", tòrna donar a nòstra lenga sa dignitat de lenga socialisada : informacions de tota mena, liureis opinions, cronicas, fulheton... Es una causa que sòrt de l'ordinari e que trobaretz en luec dins la pressa de Provença e de Lengadòc. Ne'n siam fièrs. Mai recebèm un fube de tèxtes, de novèlas, de poèmas, etc... que "Mesclum" a pas la plaça per lei passar e que de tot biais seriá pas sa tòca de lei passar. Es ansin que nos es venguda d'idea de faire un armanac qu'esperlongariá l'espelison setmanala de "Mesclum" : publicar tota aquesta creacion ben divèrsa, seriosa o galejarèla. Lo grand escrivan occitan Max Rouquette nos a fach l'onor de participar a l'aventura. Trobaretz tanben un omenatge au grand Jòrgi Reboul que nos a quitat fa gaire. E i legiretz lo nòstre car amic Jòrgi Gibelin, qu'eu tanben ven de nos quitar après aver tant fach per la cultura occitana, e dins "Mesclum" especialament. Pròva tota aquela creacion, qu'una lenga e una cultura existan, maugrat lei dificultats, e que son enrasigadas larg e prefond en cò nòstre. Pròva pereu qu'un fube de gents escrivon, ben au demai dei professionaus de l'escritura. Sovetam donc qu'aquest armanac vos adugue per tot l'an lo plaser de legir de l'occitan de Provença e de Lengadòc. Servirà tanben ai mèstres qu'ensenhan l'occitan. Bòn an en totei e longa mai ! Mesclumesca pronosticacion o Lei prediccions de Nòstradamus. Per lo bel an de Dieu e de Mesclum 1995 Carculat sus lo meridian de la nòbla ciutat de Marselha. 43.18 N - 5.24 E. An 51 dau Jornau "La Marselhesa" "Cada an novèu, agueriam, avèm e aurem desenant un armanac de mai sus l'esquina" B.H.L. filosòf - astrològ autò-proclamat. Diran çò que voudràn leis astrològs, politològs, e demagògs d'aicí e d'autra part, lei devinaires e pronosticaires venguts e avenidors, lei book makers e autrei sauta-messugas de l'informacion, lei vendèires de parpèlas d'agaças, lei marchands de cròia o de regardèlas, mai anessiatz pas crèire qu'aquest an de 1995 serà talament diferent de 1994, e s'aquela puta (1) de 1993 ni mai. Vos parlarai pas de 1992, que valiá pas mai que 1991. E donc, bravei gents (se m'engani pas ...)