Lou Proujèt "Leys d'Amors"

   Lou CIEL d'Oc prepauso à tóuti lis afouga pèr la lengo de participa à-n-un proujèt (planetàri) pèr sauvo-garda e espandi tóuti li tèste redegi en lengo d'Oc, acò dins uno grando biblioutèco virtualo counsultablo d'en pertout dins lou mounde.
   Duberto sus un site Internet, aquelo biblioutèco pourgis, à gratis, la leituro de tóuti lis escri toumba dins lou doumaine public, emai aquéli que sa difusioun es autourisado pèr si prouprietàri. Counservo tambèn pèr li generacioun futuro li tèste coutempouran que sa publicacioun coumercialo sus suport papié es pas acabado vo que sis autour n'en volon pas la difusioun.
   Aquéu proujèt bateja "Leys d'Amors" dèu recampa tóuti li que soun en poussessioun d'escrich en lengo d'Oc, e d'en proumié, li poussessour de tèste adeja sesi d'un biais enfourmati.

• Lis editour que fan la meso en pajo de si publicacioun emé l'ajudo de lougicièu PAO coume QuarkXPress vo PageMaker, soun tout indica pèr participa à-n-aquel archivage de sis oubrage souto un nouvèu abihage multimedia. En contropartido, li tèste serva pèr la biblioutèco que ié fan besoun pèr de reedicioun ié soun óufert, emai la publicita de sis publicacioun es assegurado graciousamen sus la telaragno d'Internet.
• Lis autour d'oubrage en lengo nostro que recourron à-n- un lougicièu de tratamen de tèste pèr coupia si manuscrit dins un ourdinatour vèson aro sis escri trasfourma en libre eleitrouni dins aquelo biblioutèco virtualo. Lis escrivan couneigu baion ansin uno nouvelo vido à sis obro, mai encaro li redatour de touto meno de tèste (conte, raconte, pouësìo, nouvelo, counferènci, estùdi, etcÉ) qu'an pas trouba d'editour tradiciounau, an vuei d'aquéu biais, la poussibleta de faire counèisse sis obro.
• Li mantenèire de la lengo, tambèn, que volon participa au travai de sesido di vièi manuscrit vo di libre rare podon s'assoucia à-n-aquelo prouducioun de libre eleitrouni. Soun noum, emé sa qualita de realisatour dóu doucumen acoumpagnon alor lou tèste.
• Lis Internaute enfin e passiouna d'enfourmatico de touto meno que se plaison à la presentacioun de grasiho multimedia vo à la councepcioun de liame ipertèste podon veni signa l'enlusimen de la biblioutèco.

   Basto, es tóutis ensèn que devèn mena à bèn aquéu proujèt au titre simbouli "Leys d'Amors", lou noum d'un di proumiés oubrage que presentavo, à la debuto dóu siècle XIV°, la soumo la mai coumplèto di couneissènço toucant la gramatico, la retourico e la pouëtico de la lengo d'Oc. Li "Leys d'Amors" fasien adeja pressenti uno meno d'Umanisme tout de bon sèns e de lougico.
   Apiela sus soun passat, aquéu proujèt bandis la lengo d'Oc vers un nouvel aveni...

Bernard Giély